稻香超級漁港 (已結業)

經常幫襯的稻香，每次都一定食佢地既優惠推廣既菜式，另外都會試下不同小菜，研究下邊一味小菜最好食。【波士頓龍蝦脆麵】脆麵份量都算多，2個人食好足夠，有啲脆，有啲醮到湯汁就淋身，兩種不同口感，龍蝦水準依舊，唔錯！【沙薑穗香雞】因為食落有雞味又嫰口，所以我都唔識判斷佢係冰鮮雞定係新鮮雞？總之係唔錯既沙薑雞啦！必食！！！【蠔皇鵝掌扣花膠筒】呢個價錢，可以比到5條唔細既花膠比你食，都算值回票價，花膠彈牙有厚度，唔係果啲薄切切淋pat pat既，鵝掌可以，西蘭花就失敗啲，太淋身了唔好食！【蜜汁叉燒】我特登問左服務員稻香既叉燒得唔得？好唔好食？佢答我好食，因為咁耐以來都未聽過有客人投訴叉燒唔好食，所以我就試下，果然冇呃我！我對食叉燒都有要求，稻香呢隻叉燒係屬於全瘦的，一啲肥肉都冇，雖然係全瘦，但佢食落唔會鞋口，肉質係一梳梳果種，我都幾鍾意食呢種口感既！