The Right Place (舊墟直街) (已結業)

之前試過呢一間嘅豬手非常出色，今日同男朋友又再一次嚟到呢度，今次一於試吓其他菜式。坐低叫杯啤酒，選擇返我最鍾意嘅IPA，因為味道比較濃郁。叫一個小食鬆脆香口配吓啤酒。呢度嘅避風塘魷魚鬚好惹味，仲要加埋薯片碎，極度邪惡但食唔停口。之後就到我哋要嘅兩樣主菜啦，低溫慢煮燒原隻美國野雞，雞嘅size唔算好大，啱一個人食。雖然話低溫慢煮，但食落其實同普通烤雞冇乜分別，比較驚喜嘅係雞殼入邊塞滿左雜菜同白胡椒。充滿雞味嘅雜菜味道豐富，同雞肉一齊食別有一番風味。12小時低溫慢煮烤乳豬件，同豬手完全唔同，可以用皮薄餡靚形容。外層烤得好脆，而且非常之薄，脂肪唔多食完唔會好油膩。乳豬嘅肉非常香酥嫩滑，慢煮的確係正。值得一讚嘅係配上嘅芥末籽蘋果燒汁，香甜醒胃，同乳豬好夾。食第二次嘅水準都係同之前一樣咁高，價錢又唔貴，絕對會再嚟。