翔壽司 (已結業)

今日同朋友準備喺諾士佛台飲嘢，未飲之前大家都有啲肚餓，等齊人之際我哋就決定不如喺附近食少少野。係好多嘢食嘅厚福街見到呢一間翔壽司，唔洗等位就入去試下。原來佢係一間有廚師發板食嘅立食壽司店，不過因為我哋都唔算太肚餓，就冇叫廚師發板。我哋首先點左一個刺身五點盛($138)，試下佢材料新唔新鮮，結果我哋大家都認同係新鮮嘅。呢個刺身拼盤分別有帆立貝、甜蝦、秋刀魚、三文魚同鱆紅。當中最令我驚喜嘅係秋刀魚，平時我唔係太鍾意食呢款刺身，感覺上魚味太濃。但呢度呢個秋刀魚刺身係新鮮到有鮮甜味，值得一讚。因為覺得啲刺身都好新鮮，所以我哋就再追加多左一個極上壽司拼盤。10件壽司都係唔同口味，當中非常讚嘅有三文魚子，一啲都唔腥，極新鮮。拖羅應該係中拖，唔算太肥，但油脂分布剛剛好，食落唔會有筋。另外一件非常好食嘅就係海膽壽司，佢呢度用嘅應該係比較大既加拿大海膽，雖然冇北海道海膽咁鮮甜，但海膽味好濃，而且有口感。食得出亦都係一定新鮮，重點係佢一啲都唔吝嗇，份量比得非常多！埋單每人唔洗200，下次一定會嚟試吓佢嘅廚師發板，因為都只係三百幾蚊咋！