湯•米 (已結業)

之前去過帝景灣食飯，試左好幾間餐廳，日式台式越南每樣有d。呢次去左主打台式臭臭鍋既湯•米~已經有一段時間無食一人火鍋，感覺特別期待！鍋物選擇不少，Menu上有9款，招牌臭臭鍋同沙茶牛肉鍋應該係最受歡迎。另外唔夠喉可以追加海鮮，平均每人$120，整體黎講係幾抵食。《招牌臭臭鍋 $98》每個鍋本身已經包左好多材料，除左基本既牛肉、炸枝竹、菇類等，比較特別既有滷大腸、鴨血、臭豆腐。先講湯底，一上枱唔覺得臭，係屬於越食越入味嗰種。滷大腸有3-4件，乾淨爽口無臭味。最有驚喜係個臭豆腐，同其他鍋既豆腐係唔一樣。雖然未去到台灣臭豆腐既味道，但呢度都係聞著臭，吃著香，再浸埋入味既粉絲真係幾好味。《沙茶牛肉鍋 $97》同樣有牛肉、牛丸、豆腐、炸枝竹、菇類、娃娃菜等配料。呢個鍋主要係食個沙茶醬湯底，可以再加辣，喜歡食辣既人應該會覺得幾正。滾起後既沙茶醬味道更加香濃，牛肉份量好多，連埋炸枝竹好腍好入味。《芝士凍頂烏龍 $35、滿杯紅柚子 $36》芝士奶蓋口感夠濃厚，咸香控制得不錯；紅柚子嗰杯有d似沙冰，酸酸甜甜，好適合解渴。