其實好欣賞佢仲用圓枱，依家個個為左慳位都少見左用圓枱既餐廳，團團圓圓都好岩帶長輩黎食！樓面好少人，廚房可能都唔多師傅，如果你追求快餐既速度，咁勸你唔好黎！
紅油抄手 （$65）
上海菜連鎖餐廳食唔少，味都想像到。今次叫左紅油抄手，因為朋友唔食得辣，餐廳好貼心幫我地轉左bb辣，有少少麻味！侍應即使好忙都同我地解釋個餃子係西洋菜，一般我比較鐘意韮菜餃，但意外覺得好好食！皮薄，菜同餡都好清新，手工整既餃子真係可預不可求！
上海回鍋肉 （$88）
油光閃閃，一睇就知餸飯一流，稍嫌太咸，但食番到上海既地道風味！真係係香港食咁多間，少有食得出上海味！
金湯酸菜魚 （$38）
完全估唔到呢大盤魚只係$38！好多酸菜，岩哂我呢個酸菜黨員，勸大家食得辣既叫辣啲先好滋味！魚係用左龍俐柳，魚身一定冇桂花魚咁滑，但呢個價錢算好抵食！
餐廳真係好抵食，唯一不足係上菜有少少慢，一黎可能係菜式太多選擇啦，而且餐廳唔夠人手，但想食好野就要等下師傅整啦，味道絕對唔係敷衍大家既快餐味！同埋可能太多外賣個收銀機真係好嘈。食物很不錯，推薦大家黎光臨下！
