大快活 (大埔超級城E區) (已結業)

去以過唔同分店堂食焗豬扒飯，每次個飯都係用即棄鍚紙餐盒載住，要揭起塊紙蓋先見到盒飯靚唔靚，同外賣返公司食冇咩分別。以為身處舖頭食外賣成為常態喇，今日喺度食的焗豬，竟然有焗。兜。載。住。未食先開心，咁至係堂食吖嘛。雖然叫焗飯，但丁點燶的焗痕都冇，唔好諗多咗個飯有芝士。豬扒係最鍾意的有骨扒，腍身易砌，醃得入味，正常 size；炒飯底，飯粒軟硬適中，唔係乾爭爭，入面的炒蛋份量係歷來之冠；番茄汁走清新路線，夾埋豬扒食互補長短，如果加返兩三粒車厘茄喺面，成個飯會更出色。食埋由椰菜、豆角、紅蘿蔔、菰組成的蔬菜碗，堅飽。望住空空如也的焗兜，希望同你後會有期。