吉壽日本料理 (已結業)

講起吉壽，數下手指，我諗中間已隔左有差唔多十年既時間，再黎食。一別十年，由舊時同成班中學同學嘻嘻哈哈，慳慳埋埋同朋友慶祝生日，呢家既同桌已變成未婚妻。吉壽，亦由寫紙落單，變左做掃barcode用app落單。不得不讚，相當方便，同相當準同有效率既改動。佢地提供比你出去拎既野食，仍然係相當吸睛同多花款呀今日有蘿蔔牛腩，炸雞，章魚燒，小籠包等等。話說太吸引，我好快已經比呢啲質飽我半個胃，但真係忍唔到都係個句，食放題當然係瘋狂叫刺身，佢地黎既速度同數量都相當準繩。三文魚，鰻魚，同帶子呀，都大大粒，食落好有口感，勁有滿足感。如果唔係好食生野，其他小食都好正同新鮮，比如係咖喱炒蟹，蟹粥。都好入味。最推薦都係黃金蝦，個皮一級棒。野飲方面，超級多選擇，你見幾多凍櫃就知，仲有幾隻sake飲。最意外係有熱野紙包野飲。係咁食刺身，可能會食到個人凍凍地，有暖野飲算係細心之舉