喜棧 (已結業)

 是日諗住食個簡單晚餐，黎左新開既呢間燒味店，以六七十蚊一個set既燒味餐廳黎講，佢既裝修算係有心思，樓頂掛左好多個大紅燈籠，但又唔算老土，倒影係例湯上面老實講，有啲靚。未食嘢先上茶，一嗒，咦，唔係頹茶喎，拎起個餐牌睇下，原來每日提供唔同既茶，今日既係玫瑰綠茶，清清既玫瑰味，雖然唔算係我杯茶，但美容養顏喎！灌多幾杯先。同女友一人一個set，招牌燒鵝飯同柱侯牛筋腩河，燒鵝完全無臊味，鵝皮既脆且香，但因為上枱時已經凍冰冰，所以味道打左折扣，胸肉頗嚡，有少少失望，同埋個飯竟!然!係!無!汁!架!如果鵝油豐富尚可以幫白飯增色，不過因為無，我食到最後要好可憐咁用辣油送飯。柱侯牛筋腩河只有一碗仔，一個男人食應該唔夠，但係個湯底真係正，杰杰地咁好似九仔粉個湯底咁，非常咁惹味濃郁，而牛筋腩炆得非常冧同入味，幾正，幾正。跟餐有嘢飲同小食，我揀左例湯同魚湯清菜，兩者都唔覺有味精，而魚湯甚有驚喜，一般既魚湯米線湯底都無呢個質素。最後，雖然呢間嘢裝修幾靚，但佢係無大門架，十個趣，呢日溫度得十度左右，坐係門口位啲風係咁陰啲陰啲吹入黎，吹到嘢食都凍哂，哈！唔知佢夏天係咪又中門大開架呢。