海記合桃坊甜品 (已結業)

哩排狂愛紫薯，知道海記有好多款紫薯甜品，仲有芋圓，梗係要去試啦。因為尋晚晏得濟，去到已經過咗last order，好鬼唔忿氣，今晚再嚟過，要食到為止。去到大概等咗10分鐘左右啦，等嘅時候已經睇定menu。- 紫薯蓉芋圓西米露（$28）好多紫薯蓉啊，仲有用紫薯做嘅丸子，煙煙韌韌咁，啲芋圓就一般，唔多有芋頭味。其實算抵食，起碼對得住個價錢。同豆腐花比，我比較推介西米露，好味好多。 - 紫薯蓉芋圓豆腐花（$28）哩個等咗好耐，其實都係紫薯蓉芋圓，但味道就一般，覺得紫薯蓉芋圓同豆腐花無咁夾，西米露好味好多。 - 芒果腸粉（$38）肚窄就真係唔好眼闊，又哎錯嘢。睇menu覺得應該幾好食，點知..... 其實食曬碗西米露都有啲飽飽地，頂硬上都要食埋佢。腸粉食落嘅口感，我哋都覺得怪怪地，所以，最後我哋決定淨係食個核心「芒果」，啲芒果真係甜到漏㗎。