天 · 悠蔬食 (已結業)

今日好難得可以食個一人晚餐，最近都想揀啲比較冇咁多肉嘅嘢，始終人到中年都想食得健康啲。記得荃新天地二期新開左一間食素嘅鋪頭，就決定係你啦！呢度嘅餐牌選擇都好多，最後我就叫咗一份晚餐，因為好想試吓素菜嘅咖喱會係咩嘢味道。首先黎既係白松露椰菜花忌廉濃湯配泰式鮮果沙律，個湯白松露味非常濃郁，湯既濃稠度都適中唔會太結身。沙律上面除左有水果同沙律菜，都加左花生去增加口感。搭配有水果味既醬汁係一個清爽配搭既前菜。黎到主食，覺得係素食餐廳食到紅咖哩都算比較特別而且仲要配上印度薄餅，可以話係非常傳統既配搭。因為係素食所以呢個紅咖哩就由猴頭菇去取替肉既口感，其實食落都幾似架！入面仲有好多唔同類型蔬菜，當中有瓜類亦都有露筍之類而且仲有芋頭，增色不少。個咖哩口味算係比較濃郁，味道微辣，本身唔食辣既人都可以接受到。配薄餅個味道就再濃厚d。飲品都係主打健康既西柚紅茶因為跟餐既關係所以會送上甜品，我就簡左柚子乳酪蛋糕，淡淡芝士味配上紅莓加上柚子醬，作為飯後甜品份量剛剛好。