1
有返咁上下素齡嘅朋友都會開始識睇鋪名，三寶素食係咪有啲佛教意味呢？冇錯，因為老闆係信佛嘅，所以有時店內會播啲宗教音樂，不過係好細聲嘅啫。由於係小店座位唔算多，裝修亦較平實。☺️
親切嘅老闆同老闆娘會問你要水定茶，茶係室溫嘅綠茶，好飲又解渴，如果想要個例湯就加 $3。🥣
素壽司响一般素食小店唔易搵到，但呢度就主打壽司（係咪諗到都好興奮），可以視乎自己食量揀唔同嘅餐，或者散叫。壽司款式有腐皮福袋壽司，牛油果卷，太卷，青瓜小卷，黃蘿蔔小卷，甜花菇小卷同甜腐皮小卷。不過純素朋友留意，暫時壽司醬有蛋成份，獨立包裝嘅 wasabi 有乳糖，不過老闆話會嘗試改善。👍🏻
芒果太卷 $28 比較矜貴，只可散叫，不過有次真漢子想食，又煩惱緊加啲咩先夠飽，老闆都好好人咁幫我砌咗個套餐。芒果卷好甜好好食呀，多謝老闆。🙏🏻
不得不提佢哋個一人套餐 $88，大胃王之選。一般套餐就算好多嘢食，都係每樣比少少你，呢度就每樣嘢都好足料。🤭
前菜係糖醋蓮藕，味道調得剛好，同埋估唔到鋪面嘅少少芝麻食落係超香芝麻味，個底仲有啲炆得好淋嘅花生。🥜
仲有個水果沙律，咦，以為係色彩繽紛，乜成碟都係青色？食真啲原來係蜜瓜同切片嘅梨，仲加咗啲菜絲，加埋麻醬食落味道好清新。😛
到主食喇，老闆話香椿炒飯係佢哋招牌菜式，果然冇錯。炒飯好乾身，而且味道好好，食哂碗飯個碗底連少少油光都冇。佢仲加咗啲好彈牙嘅素肉去炒，啖啖都充滿口感。😋
甜品係芝麻湯丸，以為係甜湯果種芝麻餡湯丸？點知係湯丸上鋪咗黑芝麻同椰絲，有三粒仲要好鬼大粒。咁出面鋪咗芝麻，入面係咩餡呢？原來係花生餡。甜度好適中，食落暖暖哋，感覺好幸福。🥰
老闆响落單果陣都會問下顧客係咪食純素，店內都標明如果想走蛋奶，走素丸可提前說明。小童，65 歲或以上嘅長者，穿校服學生全單可以減 $5 。不過真漢子覺得佢哋嘅嘢食價錢已經好平了，可以列入飯堂之一。😄
4
1
