素來素往 (已結業)

收咗工，想同朋友清清淡淡咁食下素食， 知道大角咀附近有間素食自助餐，價錢適中，離遠望去，外牆粉藍色好有文青feel，餐廳裏面呈工業風裝潢設計，仲擺放咗好多花草作為點綴。食物自助區分咗熟食同埋冷盤兩類， 飲品放喺雪櫃裏面可以自己攞。我首先用沙律菜配上粟米、車厘茄、藜麥再加上酸蘿蔔，自製一個前菜。 鍾意麻辣嘅我，就攞咗口水雞、酸辣鳳爪、刀拍青瓜、涼拌四川薯粉、酸辣粉絲。最好食嘅就係酸辣鳳爪，鳳爪煙煙靭靭，加上酸辣汁，口感好特別。另外最值得推介就係蔬菜卷，有紅白紫三種顏色嘅蔬菜卷成，清爽原味。炸蕃薯、炸南瓜、炸茄子，外層炸得好香脆，唔油膩。香噴噴嘅Pizza都有得食。 小菜方面我食咗南乳粗齋、瑤柱蒸水蛋、冬瓜炆支竹豆卜。南乳粗齋，炒得清爽好味。另外仲有炒西蘭花、椰菜花、菜心同椰菜。我仲食咗豆角欖菜炒飯，豆角同欖菜都係我嘅至愛，配上炒飯香噴噴。餐廳仲有合掌瓜雜豆湯、素薑醋、綠豆沙等。甜品方面有紅豆糕、椰汁糕、豆腐花等。羅漢果水，熱普洱，檸檬水都可以無限自助添飲。