Hidden Table (已結業)

前排睇燒賣關注組話紅磡開咗間新店，作為燒賣控又點可以錯過呢😎 小店主打超過十款特色口味嘅燒賣，有蒸有炸，同時提供多款掃街小食，仲有全日套餐可以叫，價錢親民化，值得到訪～ 燒賣款式有好多，今次要咗幾款推薦款色🤪 炸燒賣外層酥脆，唔乾，內裡軟糯，煙煙韌韌，帶點咬口，真材實料，感覺唔粉，好有口感～ 肉類有豬肉有魚肉，豬肉紮實，魚肉更滑順，肉味突出，兩款各有千秋，都可以試！日式版本有大阪魚肉燒賣，唔講唔知以為係章魚燒，燒汁甜甜地，配上木魚同紫菜，似模似樣🐙個人私心推介黑松露豬肉味，黑松露份量好多，香濃惹味，仲有醬可以點，蝕本啊老細！泰式魚肉味酸甜開胃，比較普通、除咗燒賣仲有珍珠雞，大大塊，外脆內嫩，十分juicy，性價比高！