網上見到服務好似唔太好 但我又覺得ok啵
餐廳有做早午晚市 早市到十點半 休息準備一陣 約十一點半十二點再開 侍應姐姐好好人 好好耐性解釋個餐牌 一於入去試下
我同友人各點左一個午餐
燒春雞配薯蓉 $98
估唔到係一整隻雞！ 話就話係春雞 但都幾大隻 外皮好香好脆 但肉味唔太夠 友人話好淡 但對我呢啲淡味人士就岩岩好 薯蓉份量都多 同樣味道唔太重都幾好 配清新沙律 推薦！
南瓜意大利黃瓜意粉 $68
呢個意粉 南瓜味好濃好香 加上爽脆黃瓜同茄子 好夾好好味 而且份量都好多 一啲都唔肥膩推薦！
另外我地都點左即磨咖啡 飲落咖啡豆係較苦嘅 或者係燶嘅豆 友人落左兩包糖都頂唔順咁苦 接受唔到 我就飲開還好 但可以改善
其實 侍應姐姐介紹店內最多人叫嘅香煎三文魚意粉 但我同友人都想食個無肉嘅粉 而且怕太多太膩 事實見到其他食客叫嘅餐 全部都勁大碟！三文魚超香但都超大舊 真係無咁上下胃口都未必食得哂
侍應姐姐仲介紹晚市只做私房菜 包勁多野食 聽落好抵
總括而言 雖然價錢呢區未到好平 但咁大份 同高質素 係推薦嘅！ 下次試下早餐先～
