靠得住粥麵小館 (MOSTown新港城中心) (已結業)

馬鞍山係香港出咗名嘅美食沙漠，但近年都陸續開咗唔同品牌嘅連鎖餐廳。呢間靠得住無論午市定晚市，都總係排着一條人龍，有時短有時長。今日晏左食飯，去到已經係下午茶時段，依然係要排隊。排咗一陣入到去，聞到好香嘅炒麵味。所以見到餐牌，幾乎係冇諗就叫咗乾炒牛河，男朋友就叫咗星洲炒米。心入面諗住：應該幾好食。我叫嘅乾炒牛河肉河粉 連埋熱奶茶$45牛肉份量好足， 唔會話得一兩塊hea下你就算。河粉唔油膩之餘，亦炒得好入味。有時喺食完炒粉麵，碟底會有一攤油，呢一間唔會。我杯奶茶 杯碟餐具都乾淨，感覺好衛生。我對奶茶冇咩要求，飲落覺得好飲。男朋友嘅星洲炒米我試食咗幾啖，同樣係幾靠得住。不過扣分位係：我叫咗幾次熱水，都冇人攞俾我。又留意到隔離枱叫咗炒飯，但好耐都未到。一催之下，先知道碟炒飯係廚房擺左一陣，只係無人傳菜。講返價錢！二人下午茶，加埋一百零蚊都幾抵食。唔怪得成日排隊！