丸十日本食堂 (已結業)

聖誕及新年總是藉口多多放縱自己， 今日終於約到中學同學去葵芳見面食飯。 見到呢間餐廳嘅裝修好特別， 播放著日本歌，令人有輕鬆嘅感覺，入去试下先。全場分咗幾個區域既開放廚房， 有大阪燒、鐵板燒、酒及刺身 counter， 整個餐廳都好整齊，仕應及廚師都好多， 上菜快同服務都好好。整齊嘅擺放加新都會廣場聖誕嘅燈飾， 感覺輕鬆良好。先來一客燒七味魚翅，雞泡魚乾食得多，今次試下呢一款， 感覺同燒魚乾差不多， 有嚼口， 價錢平成二十蚊，抵。自家製鰻魚玉子燒， 厚厚嘅蛋漿包住鰻魚， 心機野。澳洲和牛烏冬， 份量都幾多， 有成七塊。 入口嫩滑食落又痴牙， 都算高質。 烏冬係稻庭烏冬， 十分嫩滑。 只係$138, 都算好合理。銀雪魚有馬煮， 因為系新產品，睇下佢同平時燒銀鱈魚有咩分別， 有馬煑係傳統日本飲食同山椒有關，最特別就係呢兩條青椒，感覺上佢層皮係煎同燒過，特別脆口，銀雪魚又係滑捋捋。。松葉蟹肉壽司漢堡， 賣相都好精緻， 壽司漢堡有茶漬味，上面鋪咗蟹子， 松葉蟹肉好鮮味唔需要加特別嘅醬汁， 已經有不同嘅感覺。呢度原來仲有鐵板燒食， 下次出糧要豪啲再試下。