大澳德發 (已結業)

德發去過好多次，大澳德發就第一次過嚟。收工好攰，諗住同朋友嚟食餐好。一入到鋪頭見到好多打工仔都食一條蒸魚配白飯，唔使問都知呢度嘅海鮮出名啦！我同朋友諗住食大餐，所以叫咗卜卜蜆、炸墨魚餅、12少炒雜菜同埋冰鎮咕嚕頭。卜卜蜆做法好簡單，只係落咗生蒜同辣椒，上咗枱先開火滾。以為會好鮮甜，但食得最出嘅係蒜味，而家越食越辣😂。蜆有小小沙，要注意下。食完蜆店員會加個湯落去煮卜卜米。味道還好，不過不失啦～12少炒雜菜就係有款唔同嘅雜菜，最特別係蟲草花，仲有薑片👍🏻調味偏甜，同埋落咗芡，個人就唔太喜歡。墨魚餅炸得好鬆脆，唔似出面嘅咁厚實，仲食到粒粒墨魚粒。推👍🏻壓軸介紹冰鎮咕嚕肉，用咗半肥瘦嘅梅頭，切很好工整，放入口啱啱好，仲會入口即溶。脆漿好薄，加埋咕嚕汁嘅酸甜，配合埋冰鎮效果，一咬落去就好似食冰糖葫蘆咁「卜」咗聲，掂！全枱人一致通過佢最好味！呢間海鮮選擇多，小菜款式都唔悶，坐得又舒服，間唔中都可以來食下。下次一定要食蒸魚！