塚田食堂 (已結業)

同男朋友行街買衫，行完都有啲肚餓見到呢間喺將軍澳新開嘅塚田食堂，專食日本料理，好似都幾吸引，一於去試吓。我哋分別各自叫咗個定食，男朋友就嗌蛋包飯配炸魚，我就叫個烤魚定食，每款定食都可以包左出邊嘅沙律吧任食，同埋飲品任飲，感覺都幾抵。沙律同飲品嘅款式都好豐富，仲有唔同嘅醬汁，見唔少人都飲佢哋嘅特製茶飲，味道都唔錯嘅！蛋包飯定食嘅份量好大，真係非常豐富，加埋炸魚好香脆，就算男仔都食唔晒！佢嘅薯仔沙律同埋配菜都好好食，值得一試！烤血鯛配鹽㽤烤雞定食，淨係賣相都夠晒豐富，除咗一般嘅前菜麵豉湯等等之外，條魚足足有兩隻手掌咁大條，感覺兩個人食都夠。魚肉結實有魚香，外皮燒得好香口，就算唔加醬汁都好好味，烤雞味道好香雞肉嫩滑但清爽，配飯食真係好好味。兩個人每人一百左右， 午餐嚟講價錢都唔貴，但質素好好，更加包左咁多款唔同嘅飲品同沙律，對於大胃王來講一定夠飽。