櫻木

The Hennessy 位於灣仔軒尼詩道256號，地點好方便，雖然唔太顯眼，行經過可能淨係會留意到759 ,但其實呢幢大廈暗藏幾間有水準嘅餐廳 ， 櫻木就係其中一間！

餐廳位置喺3樓，一開lift門就見到

內裏環境優雅，而且播嘅歌曲都係日文歌，當晚播左幾首平井堅嘅歌都好好聽

餐廳在食客用餐前及用餐後都會送上熱毛巾，非常細心，值得一讚！

麵豉牛舌大根煮

$80

第一道菜已經極度有驚喜，牛舌食得多，但呢碟牛舌絕對算得上目前來講食過最好味嘅牛舌，不但肥瘦適中，而且有別於平日食嘅牛舌，好重牛味，而且炆得好琳，入口即溶，食完令人好難忘懷

牛舌中間位最淋，口感類似鵝肝

季節菜雜錦天婦羅（7件）

$80

炸物一啲都唔油膩，食完都唔會覺得「漏」

鰻魚炸豆腐

$48

原本以為係炸豆腐上面放一塊鰻魚，點知原來係將豆腐切開中間夾完鰻魚之後再一齊炸，口感更豐富更有層次，有驚喜！

男友大讚豆腐好滑

吞拿魚、三文魚及甜蝦壽司

壽司雖然係細細舊，但三文魚同埋吞拿魚其實算厚切，所以一啖食落口令人超級滿足甜蝦壽司亦好甜好鮮味

軟殼蟹牛油果卷

$70

即使平凡如牛油果卷，細心一睇亦都會見到青瓜同牛油果係切完一片片再放入去，令到口感更加豐富同埋有層次，反映到每道菜都屬於心機菜

凍蕎麥面

$50

蕎麥面口感好清新，食完有消暑嘅感覺，不過如果味道濃d會更切合個人口味

黑松露炒雜菌

$70

黑松露味濃郁，平均鋪在雜菌上面，令到菇味同埋黑松露味完美融合

埋單大約＄550 ，兩個人都覺得物超所值，如果同朋友慶生或者情侶想浪漫一下呢間餐廳都係一個唔錯嘅選擇！