叫左唔多嘢食，食物又細細份幾精緻，啱晒又想食、又怕肥嘅我。
按好味指數排列:
🍚美人框飯 - 蒲燒鰻魚框飯 $55
框飯名字真係好特別，搵一搵資料，原來框飯係新潟嘅鄉土料理，係裝在小蒸籠裡面嘅炊飯。而呢度用左糯米去做，個人十分喜歡這種黏黏又軟糯嘅質感。值得讚嘅係佢嘅烹調方法，令本來應該有點硬嘅糯米飯煮得軟身，但卻又依然煙韌，
配上肥美嘅鰻魚食，呢個真係好好味。不過留意份量，較適合細食女士享用。
1
🥗美人農場沙律 $88
唔單只有沙律菜，仲有士多啤梨、三文魚、牛油果。menu特別注明沙律汁係甜酒x鹿兒島草莓嘅特製醬汁，果然係好唔同嘅沙律汁，有微微士多啤梨嘅甜酸味，仲有帶甜嘅酒香，與食材伴混進食，開胃之餘，亦令三文魚的鮮味更特出。
🍕炙燒走地雞年糕薄餅 $98
年糕同薄餅竟然出奇地夾，薄餅外圍會較香脆，但中間部份有薄餅混合年糕嘅煙韌，加上烤雞嘅肉味令整體味道入口更豐富；雞肉粒雖然經過烤焗，但仍然嫩滑，亦保留到小小肉汁，唔會亁硬，值得一試。
🌯三文魚牛油果美人卷 $42
雖然呢個排最後，但其實呢個味道絕對唔差。米紙很薄、很滑、亦夠濕潤軟身，三文魚幾肥美，最精彩係有好大粒芝士，令到整體本來幾清嘅味道，因為芝士濃烈嘅鹹香味而即時提升，芝士控必定要點呢個。
呢餐本來只為薄餅而來，但最後卻發掘到更多令人意想不到的美味，驚喜之餘亦食得滿足。
