戀上台式料理 (已結業)

行完將軍澳海旁，就見到一排好chill嘅餐廳，由於疫情影響，本身嘅台灣trip cancel咗，唯有搵返間台灣嘢彌補下。餐廳好有sense，為咗保障員工同食客嘅安全，每位客人入餐廳之前都要測試體溫同埋搽酒精搓手液消毒雙手，值得讚賞。餐廳格局好寬敞舒服。每一張枱都有一個獨有嘅QR code，客人只需要scan QR code就可以用自己嘅電話點菜，方便又快捷又可以減少人之間嘅接觸，尤其是而家呢個非常時期。口水雞三小拼盤：口水雞估唔到都幾辣，惹味十足；糖心蛋熟嘅程度啱啱好，小小流心，正！滷水豆腐一直係我嘅最愛，滷水未夠濃，好味～鹽酥雞扒魯肉飯：雞扒超級無敵大塊，炸得酥脆入味，魯肉飯嘅肉係偏瘦嘅，符合返香港人嘅口味，另外仲附送三種前菜，包括花生、涼拌木耳同青瓜。魯肉配時菜：第一次食呢個配搭估唔到有幾夾喎，原本以為配埋魯肉會好滯，點知完全唔會，反而增加左菜嘅甜味。戀戀蚵仔煎：味道不過不失。黑糖珍珠鮮奶：好大杯，少左甜之後我覺得甜度啱啱好，珍珠黑糖味濃，送台灣美食至夾之選。總括嚟講，呢間餐廳嘅嘢食平靚正，天氣好嘅時候仲可以坐喺室外望住海旁食添，不過一定要等疫情過後先好咁做啊!!