阿爺粥品手工涮涮鍋 (已結業)

一大班朋友仔約埋出嚟，梗係打邊爐啦！聽聞過呢間粥底邊爐有啲特色湯底，所以大家一致認同去試試佢！先係搵鋪，今次竟然迷路...個位都有啲收收埋埋，唔易搵到！所以都花啲心機先得，入到去第一感覺就係冷氣都幾勁！同行輕淑女們個個都出哂秘密武器小圍巾就知不得了，想去記得帶定外套！不過鋪頭都幾乾淨，而且幾有氣派，坐得舒服嘅。因為人多，最後叫咗2個窩，一個日本清酒黃蜆白粥鍋、一個龍蝦海鮮泡菜鍋，清酒鍋食食下會有唔同感覺，因為一開始都有啲酒味，食食下可能酒揮發哂，胡椒味就好出，變相好似叫咗2個窩咁。泡菜鍋呢？唔依得辣就最好唔好叫喇，真係好辣下！嗜辣者福音，我自己就一半半啦！不過真係要提提呢到嘅海鮮，一讚！好多都勁新鮮，而且擺位都好靚，好多餐廳諗住火窩無得點擺盤，其實唔一定！好似個鳳凰蚌咁，上枱時睇到大家哇哇聲！呢隻蚌蚌唔平，48蚊一隻，勁鮮甜，我個人係驚青怪，食海鮮喜歡煲耐啲，心理上乾淨啲嘅代價就係好韌...不過呢隻蚌煲成10分鐘都無咩縮水，而且仲好爽口，可以一試！蝦都新鮮架，加埋清酒鍋入面取之不盡嘅蜆，今餐真係好有海洋味道！而最後一提，佢加湯係加粥架！見到啲白雪雪嘅粥由個壺倒落去個窩到，真係幾得意！