Dazzling Cafe (The ONE) (已結業)

和風BBQ豬扒三文治，諗住嗌呢個大大份影相都靚啲，勝在份量十足超飽肚，麵包烘過，吉列豬扒有啲鞋，配左蛋黃醬都係整體乾得制，薯條方面冇調味，太幼身，個人喜歡粗身既多啲。走左紫菜後既明太子義大利麵，賣相欠奉，不過食落味道不過不失，都好多一粒粒既明太子。水牛城辣雞翅佐藍紋芝士醬都幾辣下，唔食得辣既話可能唔係好食到，我辣到要飲野，芝士醬因為係blue cheese，我朋友就唔係好接受到佢個種獨特既味，就咁食雞翼反而味道更加好，本身已經濃味，另外有一兩隻中間部分唔夠熟，有啲紅。凡爾賽荔枝茶既漸變色好適合打卡，味道飲落重玫瑰味，反而荔枝味唔太出，整體味道唔錯，甜度岩岩好。朋友嗌左仲夏熱帶水果茶，飲到好濃既雜果味，用料一啲都唔馬虎，唔係求其沖。當然唔少得飯後甜品😋京都宇治抹茶紅豆鬆餅加麻糬，有得加麻糬係窩夫內層好特別！口感變得豐富，有啲煙煙韌韌。因為係朋友生日所以餐廳幫我地預備左蠟燭，窩夫賣相不錯，生日牌係我地自己加上😂然而，部分水吧店員服務態度冷淡，出現不回應客人問題的情況，負責上甜品既店員做法生疏，竟然係壽星面前問蠟燭插邊然後先插上，實在令人尷尬。整體而言食物質素同美觀程度唔錯，餐廳環境適合打卡