一粥麵 (已結業)

今日身癢，大熱天時，行到滿頭大汗去玩搭渡海小輪返工。然後更身癢嘅係唔去附近東海堂買麵包早餐，竟然走去一粥麵。嚟到一粥麵，見到$27魚柳炒蛋早餐，仲要平過大家樂(佢最近加咗價，由$27.5加到$28)。其實佢兩間都係大家樂集團，但係同樣食品竟然平$1，咁梗係要食佢啦！當個餐到手，望落個樣真係都幾大差別。唔單只個樣，原來食落都好唔同...先講塊麵包，個樣都係一塊普通嘅烘咗嘅多士，但係咬落我以為自己係一條「金魚」，口感似食緊餵魚嘅麵包，完全無咗麵包應有嘅煙靭。再講塊魚柳，無乜魚味，淡口，同大家樂塊魚柳相差太遠。最後到炒蛋，齋睇個樣，都算係我比較喜愛嘅煮法，唔係大家樂那種半生熟嘅炒蛋。點知食落...竟然可以無乜味，應該話連蛋味都無乜...仲以為係自己條脷病咗...總括嚟講，如果只為飽肚就無乜所謂，至少唔會食壞肚。不過同大家樂只差$1，下次我都係選擇大家樂罷啦~起碼仲有啲味道，係哩度合埋對眼真係會唔知自己食咗乜落肚。我諗哩度好似舖名咁，只係啱食粥同麵...