翡翠小廚 (已結業)

肚餓餓想食沙薑雞，見到翡翠小廚午餐有沙薑雞就即刻入咗去食！坐低即叫沙薑雞配芋頭鹹肉鮮蝦五穀炒飯，等咗十分鐘左右就嚟咗個炒飯。個炒飯都好大碟，師傅炒得好好，飯粒粒分明，唔會炒到黐住，仲要唔油，入面有幾粒小鮮蝦，芋頭切得好細，容易入口，唔怕哽胃又唔會太硬。雖然個飯較為淡口，但好適合配沙薑雞食，食落幾香，唔錯！食咗一陣沙薑雞都嚟，成碟雞擺得好靚，仲有三小碟滿滿配料食，分別有鹹酸菜、菜莆同薑蓉，好開胃。食埋啲雞，覺得似鹽焗雞多過沙薑雞，無乜沙薑味，似鹽焗雞嘅鹹味多啲！但啲雞都好好食，份量夠大份。最後啲炒飯食唔晒，打包走！翡翠小廚啲服務好好，啲姐姐見到我杯茶唔滿就即刻倒滿俾我，好貼心！