意樂餐廳 (翠屏(北)商場)

营业中

休息中

話說最近觀塘翠屏開左一間意樂，於是就去試下。 可能大家唔熟觀塘的翠屏，同大家介紹番。翠屏係一個冇大商場的舊式屋邨，基本上餐廳嘅數目寥寥可數，如果住得耐嘅話，基本上食物嘅選擇係冇乜嘅。 而且可能區內嘅老人家比較多，所以中式餐廳或者食物就會比較多，區內亦都係欠缺一間西餐廳，而意樂今次嘅開張就令區內有返一間大家期待已久，而且比較似樣嘅西餐廳。 相信區內嘅市民同埋返工嘅人都期待咗好耐喇，點解會咁講呢？就係因為開業到而家基本上每一日都係爆滿嘅。 今次我就係晚市叫咗個雞扒滑蛋配茄汁飯， 咁本身呢個飯呢係跟蒜蓉汁嘅但係由於我唔係好鍾意食蒜蓉所以就要求店員改咗番茄汁。店員都好好幫我改左。 呢個飯就53蚊，唔跟任何嘢飲同餐湯，而且我今次係叫外賣，所以感覺上個飯出到嚟，就比較普通。雞扒不過不失，都係用扒爐煎出嚟，調味唔錯雞扒亦都有肉汁，但係就唔好期望有脆邊呢啲嘢啦。個蛋都值得一讚，因為本身係叫外賣所以都預咗佢比較老，但係出到嚟都幾嫩滑有啲驚喜。茄汁酸甜適中，都係普通茶餐廳食到嗰種啦，唯一要讚既係份量夠多，夠撈飯。飯就爭少少，係普通白飯，而且比較淋身。