日昇車仔麵 (已結業)

呢間店無喺葵涌廣場做之後，一直喺葵芳都食唔到有水準嘅車仔麵！原來佢靜靜地喺呢度開返，都係朋友話我知先知道咋！今日行完街，即刻去啦！依然見到老闆笑面迎人，其餘侍應都係舊人，有熟識感覺！店舖比之前大好多，又乾淨、又光猛，唔似以前喺條行入面，啲人一食煙，真係煙霧迷漫！而且坐位亦寬敞，比以前坐得舒服！一場嚟到，梗係要食返佢哋啲手本名典！不過一次叫唔哂，只叫了蘿蔔、豬紅、墨魚丸、貢丸、蝦條、米線啦！呢度啲墨魚丸唔會太林，唔似出面嗰啲咁粉。貢丸亦好有香味，我每次都例必會叫！豬紅就辣辣地，雖然我唔食辣，不過可以接受，味道真係正！友人就叫了油麵、魷魚、雞翼尖、豬皮、黑椒牛筋丸，佢話啲魷魚好爽，雞翼尖好入味，豬皮燜得好好食咁話！我梗係唔執輸，試吓佢嗰啲啦，平時我唔食豬皮，因為出面嗰啲林林地，無口感，不過呢度啲豬皮就好爽脆喇！以咁嘅價錢，食到啲有質素嘅食物，足見老闆係對食物有要求嘅人！而家賣埋奶茶、咖啡添，車仔麵都有奶茶、咖啡飲，都幾特別噃！所以我叫咗杯奶茶試吓，幾香！都有茶味！幾似茶餐廳嗰啲啦！整體上食物能保持水準！抵食！