板長壽司 (創紀之城五期) (已結業)

今日難得同老公二人世界就去行下少去嘅觀塘，行行下就坐得食個tea。見好耐冇食過板長所以就食下。蔥粒吞拿魚腩軍艦：吞拿魚腩仲未溶得哂雪，同埋已經冰到冇味。三文魚醬油漬壽司：特價2件14蚊，估唔到又幾好味，油香重。劍魚腩：油份夠但鮮味就欠奉。三文魚：切得好薄....一口帆立貝：有鮮味，唔錯。火炙魚背赤酢壽司：我不嬲都好中意罎女魚背嘅壽司，因為覺得夠魚油味，會食得出魚香味，加上用火槍燒過油份更出。火炙芝士三文魚：另一種食法又幾特別，但芝士味會蓋過三文魚。鮮北寄貝壽司：好爽口，同平時食開嘅唔同，鮮味亦好夠。油甘魚壽司：次次上檯都同menu 唔同樣，但都幾妳好味，魚身爽口。赤酢系列壽司三件：其實上到檯我都已經分唔同邊件打邊件，但食食下發現點解同我地上一碟一樣...我都有懷疑過係咪上錯....但老公話是但照食....另外仲叫左2樣熱食，但明明同壽司一齊叫，但足足等左大半個鐘先有.....和風蒸蛋：我老公話味道同質感都係中式蒸蛋，感覺奇怪，佢覺得元氣嘅好d。甜蝦牛乳白湯：比以前份量細左，成碗都冇蝦肉，只有紫菜，同一粒好似湯丸嘅野，但應該有用蝦頭煲所以有蝦油。