海逸軒 (已結業)

又要食工作飯喇!今次同上次一樣,都係成圍咁食,雖然部分菜色重覆,但係某d菜式都有變化。今次點心盤包括香麻叉燒酥、鮑貝香菇燒賣、xx上素餃,好可惜無左上次食過勁好味既黃金豆腐粒呀!呢三款只係普通, 叉燒酥最一般, 鮑貝香菇燒賣食唔出鮑貝,反而豬肉係主要部分, 上素餃係三個之中最好,都多料,有好多菇粒、甘筍粒同埋一d我唔知名既素類既粒,連青瓜粒都有,而且唔油,好味!另外一味特色菜係蝦乾瑤柱竹香飯,真係從未見過綠色既飯呀!粒粒都係色架,好似綠茶雪糕隻色咁,食落好香,但係唔會有特別味道,飯質感好軟好腍,材料除左蝦乾(唔知點解我果碗既所謂蝦乾好大條又好多肉)同瑤柱,仲有好多蛋白,真係好多,啖啖都食到,每碗飯面仲有蟹籽架,都幾靚,仲要唔油架,所以又係好好味呢!呢一味值得推介呀!如果可以,我都想食多次添!其他野都係咁啦,不過個雞脾菇差左呀!今次好靭,莫講話用牙難咬,用刀都好難先切得開!同埋,如果要挑剔既話,桂花糕既心型今次整得無咁靚呢!