大都烤鴨 (已結業)

中國菜系中北京烤鴨都算係我其中一樣最鍾意嘅美食，所以我自己好熱衷周圍試吓唔同餐廳嘅北京烤鴨睇吓邊間最好食。K11嘅大都烤鴨都算係係香港來講我覺得都幾好食嘅北京烤鴨，佢嘅配料比較特別除咗普通嘅京蔥青瓜之外，仲會有蜜瓜，可以令烤鴨嘅味道提升到另一個層次，另外佢嘅餅皮唔會話好厚，加埋砂糖同埋甜面醬包起來嗰陣一啲都唔會話太肥膩，不過因為佢嘅價錢都唔平，所以唔係成日食。今次都特登叫幾個朋友仔一齊去食下，順便食下佢其他嘅餸菜。我哋就叫咗個二人套餐，另外叫多咗一份糖醋魚，雪裏紅火鴨絲年糕，同埋額外一份小籠包。小籠包嘅質素都唔錯，皮唔算太厚，而且湯汁都好多，我覺得合格以上嘅！另外糖醋魚我都覺得幾驚喜，一嚟都幾大碟，而且佢嘅魚肉幾香，炸嘅外皮唔算太厚，食到有啖啖肉嘅感覺，相比之下雪裏紅火鴨絲年糕就比較遜色，雖然都聞到鴨油嘅香味，但係相比之下就比較普通。二人餐我覺得性價比都唔錯嘅，佢包括左半隻烤鴨，黑椒炒蝦仁，干扁四季豆，豆腐湯羹同兩份前菜，價錢大概係四百幾蚊左右，我自己覺得味道都唔錯嘅，如果同屋企人食好啲嘅話我都覺得係一個好選擇！