翔壽司 (已結業)

見厚福街呢一間立食壽司好似幾得意，所以就走咗入去試下，冇諗過原來質素都唔錯而且唔算貴。鋪頭唔算好大，圍住師傅有一張吧枱，就係客人用餐嘅地方，師父親自整完就會將壽司經由後面吧枱底送出去俾客人，好有日本風情。我係比出面158蚊十件壽司吸引，所以先入嚟嘅，入到嚟就自然要食番呢一個餐喇，佢有一張紙有唔同壽司可以揀十件。 店員好熱情咁話我知一款壽司最多可以要兩件，不過其實我 鍾意試新嘢，所以我十件壽司都揀咗唔同嘅款。說實在，我唔係太清楚亦都唔係太識分啲魚生，所以就影咗張圖，食家就應該識分。不過我真係想講佢嘅魚生好新鮮，而且油香味好重， 食落口唔係普通廉價壽司。無意中見到佢個牌寫住紫蘇葉紫菜包大拖羅 ， 咁嘅食法我真係未試過，而且個人十分鍾意紫蘇葉嘅味道，就忍唔住嗌咗個試下，發覺佢嘅拖羅真係好好食， 再配埋紫蘇葉，出奇地夾，而且師傅用咗特定嘅醃料醃個大拖落，亦都叫我唔需要點豉油，就咁直接食就可以，因為已經調咗味，個人覺得呢嚿魚生真係超抵好食。最尾見到人哋嗌咗個鰻魚手捲，我又跟住嗌， 食落發覺真係冇叫錯，超大舊鰻魚肉， 而且鰻魚烤得好香好好食， 下次可以再試。