鹿鳴春飯店 (已結業)

有事要敲門，一早來到，經理剛巧不在，既然要等，乾脆約埋友人一齊，實行食住等。午市平有平食，貴有貴食，平的可以叫客飯加點心，貴的可叫烤鴨等大菜。小市民還是叫些點心算了，友人愛點心，就叫了小籠包、又叫了燻魚及海蜇，嗜牛，順便叫碗牛肉湯，再加埋符離集燒雞，兩人吃，其實是有多無少。午市點心只屬一般貨色，尤其是小籠包，皮薄餡實，筷子功再強，也會穿，燻魚先炸下上醬汁，特別在用的是倉魚，汁做得幾好，試得過，海蜇無乜特別，無用滷水浸過，爽身但淡口，要配芥末來吃。食到7788，見到「燒雞車」推出來，滷水車仔一半位置是載汁的，雞浸在內，即叫即在面前撕開（用鉗），肉浸到腍，鬆化入味，又話說符離集燒雞原來是手撕雞，故事一疋布咁長，不敘了，有興趣來吃的話可以問問經理他是有問必答的，連你唔想知的都會話埋你知～吃到最後，同場加影拔絲蓮子，浸在冰水，又甜又脆，可惜沒有拔絲蘋果般又外冷內熱的感覺。