皇庭匯 (已結業)

今晚我們一家四口今晚去咗「皇庭匯」旺角店食晚飯！由於又係突然興起決定去食，無一早預訂，所以我們一向訂開四隻嘅頂角大糕蟹，都只得兩隻！所以我們叫咗爐吊鹽焗鷄、香煎南非鮑魚、濃湯豬骨鷄煲大排翅、清蒸頂角大糕蟹、蒜蓉粉絲蒸大元貝同豆豉鯪魚炒油麥菜！甜品：芒果糯米糍同楊枝甘露！爐吊鹽焗鷄嘅外皮燒得好香脆，肉質相當嫩滑，唔會有「嚡」嘅感覺！香煎南非鮑魚嘅表面煎得非常金黃香脆，入面嘅肉質極之嫩滑彈牙，完全無韌嘅感覺！濃湯豬骨鷄煲大排翅嘅湯底超級濃郁，味道好鮮甜，大排翅嘅份量非常多，口感相當爽口彈牙！清蒸頂角大糕蟹嘅蟹糕超多，質感非常甘香軟滑，肉質相當鮮甜彈牙！蒜蓉粉絲蒸大元貝嘅肉質超鮮嫩彈牙！豆豉鯪魚炒油麥菜炒得好爽甜入味，豆豉鯪魚嘅油香掩蓋咗油麥菜嘅草青味，味道相當惹味！甜品：芒果糯米糍嘅糯米皮極之軟熟彈牙，入面包住嘅芒果肉好大件，味道超香甜！楊枝甘露嘅材料相當豐富，味道酸酸甜甜，非常醒胃！