金記冰室 (已結業)

之前有另外一間冰室有升級豪華版，係有海鮮同酒樓菜式食嘅，一直想去試，點知在我未試之際，竟然撞咗入另一間冰室嘅升級豪華版，升級路線又有少少唔同。呢間冰室係向大排檔方向進發，竟然有避風塘！叫左避風塘軟殼蟹，都有4-5隻，炸得好鬆脆，口感係滿意既。一如平日，大部分既葱都比我KO咗......另外仲叫咗豉椒炒蜆，乃本人最愛麻甩菜式之一。雖然鑊氣唔可以同大排檔比，但起碼啲蜆既size有返咁上下，有蜆味（咁講好似好廢），值得讚既係，佢啲洋葱唔係求其炒兩嘢就算，而係熟到入心同入味既，唔似有啲食肆既洋葱咬落會辣口。青椒都係熟透入味。鍾意食配菜既人就會明白呢點係幾咁重要！人係貪心既，又想食鑊氣，又想坐得舒服，呢間都叫做攞到平衡啦。最可惜係冇啤酒！只差一點點就perfect 喇。唔知下次黎有冇機會佢攞到酒牌呢~