旅窩 (已結業)

今日同朋友行完PMQ元創坊，睇睇時間原來已經到左晚飯時間喇，於是黎到呢間係PMQ附近既台式料理小店食飯喇。一入門口就已經俾呢度既裝修風格吸引住，所有佈置同擺設都好精美別緻，濃濃既文青味道直接飄過黎😌，係呢度真係可以搵返去旅行既感覺！講返食野先，呢度主打係食台灣菜既，選擇都算幾多。招牌豆乳鹽酥雞配滷肉拌麵（$78）首先咬一口鹽酥雞先，真係不得了！雞皮炸得十分鬆脆可口，入面雞肉既質感亦都非常香嫰軟滑，而且兩者都冇散開到，所以食落口感好結實，仲有最欣賞既係每一粒都夠哂大舊！另外值得一試既係店主自製既蝦醬，點少少再食香味會更加突出添。至於拌麵配滷肉都好入味，麵質仲夠哂彈牙添！😋😋百香果薄荷mojito梳打（$52）百香果既果味好濃郁，加埋少少幽香既薄荷感覺特別清新醒胃，而且呢枝黃色既飲管仲可以食得添😝甜甜地又唔錯喎～黑糖仙草鮮奶（$44）黑糖唔算好甜，但係呢個甜度都幾啱我口味，仙草都幾有咬口～～焦糖脆脆香蕉忌廉糯米窩夫（$138）嘩，呢個窩夫既口感好新奇，因為加左脆脆係表面，所以咬落去係特別鬆化同埋脆卜卜既，另外雪糕揀左我比較鍾意食既曲奇味，夾埋香蕉令到層次感提升左唔少，真係冇得彈啊👍🏼👍🏼