自助吧
同其他放題相比自助吧嘅選擇多，除咗常見嘅螺肉、中華沙律、麻辣魚皮等前菜小食之外，仲有海鮮、沙律、點心，水果吧更加有香印提子同榴槤肉任食。
壽司刺身
刺身嘅拖羅高質，粉嫩肥美，三文魚油甘魚等都係厚切上。鱆紅魚簿切，展現左師傅嘅刀工，鮮味無比。平時食放題都冇乜點叫壽司，但呢間真係要狂叫因為佢有北海道海膽軍艦任食！海膽粒粒都好完整食落鮮甜無苦澀，係全晚嘅焦點所在。
熟食
唔單止燒海鮮、串燒應有盡有，估唔到連鵝肝多士都有，大大塊嘅鵝肝油脂豐富味道甘香，配上厚厚嘅脆多士同酸酸甜甜嘅醬汁，層次豐富又唔會太膩。其他一品料理都高質，上湯芝士焗龍蝦烏冬用料上乘、避風塘炒蟹香辣惹味、王牌燒乳鴿皮脆肉嫩，值得一試。
甜品
燕窩椰皇燉蛋白白又滑，甜度適中。雪糕有多款牌子，我推薦Milktop嘅沖繩海鹽味，甜中帶鹹。仲有個甜品專櫃，入面有精緻造型嘅菓子，呢期係冬天所以係可愛嘅雪人，但建議早啲去拎，因為好搶手。
