趁住娘親去咗旅行，就同男朋友約埋老竇一齊去大快朵頤。我哋一早訂咗位，六點鐘嚟到嘅時候發現全場已經八成滿，一問之下原來七點半離座，火鍋配料同小食都有半價優惠，頓時即刻心心眼
呢度唔止有得打邊爐，原來仲有雞煲供應架！但今晚想食海鮮同牛為主，所以就決定打邊爐慢慢嘆🤫
湯底都好有特色，加咗幾轉湯味道依然都keep住，真材實料，要俾個like佢👍🏻
見到隔離枱啲牛好靚，一問之下原來只係最平嗰種美國特級肥牛，肥瘦分明，咬落仲好有牛味添，而且份量亦都比我想像大份，抵食👍🏻
十全大寶丸係呢度嘅招牌菜之一，當中佢嘅香煎鵝肝蝦丸同埋黃金海膽黑墨丸係我至愛。一人一粒絕對唔夠喉想encore🙊
蜂巢豆腐亦係我嘅至愛，可能因為佢索曬嘅湯底香濃嘅雞加螺頭味，所以食落好入味，而且夠曬厚切，兩者配合埋無得輸
爆芝響鈴成功投得我家主子歡心
我就怕肥所以唔敢試，但見佢新鮮炸起又冇油益味，內裏嘅流心芝士都好juicy，係側邊勁我流晒口水
另外仲叫咗羊肉片，相信配麻辣鍋應該會更Lam lam脷
呢度嘅皇帝菜好新鮮，唔會有渣，所以我叫咗兩碟，食咁多肉清下腸胃呀嘛
Seafood lover襯住半價就梗係要叫美國桶蠔豪一豪佢啦！一碟五大隻，隻隻都好似手掌咁大，而且一啲都唔腥，好新鮮㗎
至於爸爸欽點嘅白鱔片，冇骨之餘仲好新鮮，爸爸呢個愛魚之人都話比一百分佢🤟🏻
見佢半價咁抵，而且整體材料都好新鮮，所以我哋臨尾都再order左碟象拔蚌仔。爽口彈牙，忍唔住一舊接一舊自私食
三個人呢個價錢食到咁新鮮嘅火鍋配料，真係絕對值得推薦比朋友，嚟緊冬天應該呢度將會成為我哋嘅新飯堂
題外話，坐窗邊原來可以望到繁華嘅旺角，配以日落餘霞，呢個view真係好特別，發現自己都未試過係呢個角度感受旺角。今餐真係正到痺呀
