上品火鍋料理 (已結業)

見天氣轉涼，所以決定去打鞭爐，依個天氣真係好適合呀。一坐低，待應放低左一盤醬料，醬料分別有生蒜、炸蒜、辣椒、沙爹醬、麻醬、炸薑蓉、蔥粒、芫茜，仲有係出面好少見既醬皇，醬皇既味道有少少似馬拉盞，依個醬都幾香。另外，由於見到澳門依兩個字，係出面未試過澳門豬骨湯底，所以就叫左個試下。湯底：豬骨湯味香濃，仲有淡淡既胡椒味，依個秋風起既時候，揀依種湯就最適合不過喇。炸響鈴：新鮮炸起既響鈴，浸一浸湯，炸腐皮已經索滿左豬骨湯既精華，完全唔洗點豉油，正。然後第二舊試下唔浸湯食，點佢一齊附上既甜酸汁食，第一啖落去，非常鬆脆可口，甜甜酸酸咁，配啤酒既佳品。灌湯茄溶包+鮮蝦雲吞：見依兩樣野都係推介，所以就叫左黎試下。灌湯茄溶包釀入豬肉+茄溶，咬既時候仲有湯流出黎，味道酸酸甜甜，好野味同醒胃，依個湯包有驚喜！而雲吞入面就包左鮮蝦同豬肉，鮮蝦好新鮮同爽口。魚片頭：魚片頭索左豬骨湯既味道，唔洗點豉油都已經好夠味，魚片好彈牙爽口。西班牙黑豚肉：黑豚肉放得好精緻，上面特登放左d花瓣裝飾。而肉質方面，脂肪同黑豚肉既比例平均，咬落去肉質鮮嫩，正！竹庶茅根：打鞭爐緊係要飲d下火既飲品啦，味道唔會太甜，飲完當堂覺得自己無咁熱