D Corner (已結業)

好嘢係要時間去發掘嘅，就好似油塘D Corner咁，你唔細心啲都唔會發現，但絕對係一間值得一試再試嘅餐廳！你一睇價錢，可能會覺得好貴，就好似我早幾日去幫襯咁，一睇個set dinner餐牌就諗住走人，但見到其他客枱面上嘅食物咁靚，又想試一試。我哋一行五個人，四大一細，無論去都邊都唔會係受歡迎顧客，因為好少餐廳有四人以上嘅枱，D Corner亦一樣，但佢哋嘅侍應一見到我哋入去幫襯，立即毫無不悅之情咁拉枱擺bb櫈，服務的確唔錯。Order完，等咗陣，頭盤就到。頭盤嘅作用就係開胃，而嘅個頭盤真係交足功課，食完急不及待想繼續食！個主菜真係驚喜一浪接一浪，我點咗條我聽都未聽過嘅魚：檬鰈魚。佢個餐牌寫住係原條，心諗會好細條啦~但條魚一嚟到，嘩！咁大條嘅？！呢條魚簡直喚醒咗我身為香港人嘅本性，就係無魚不歡。我未食呢條檬鰈魚，我都唔記得自己原來係咁鍾意食魚…甜品原本只係一個西餐必備嘅環節，無咗唔係唔得，只不過無甜品會好怪。但D Corner嘅心太軟，就為雞肋甜品出咗一口氣！呢份心太軟，可以令辛勞嘅香港人暫時舒緩一下，亦都係一個強而有力嘅收尾，可以見到D Corner嘅一絲不苟，無論幾細微嘅嘢都力求完美