今次就揀左最入門既$900 set，包括左前菜、壽司十款、湯、海膽手卷及甜品
坐係bar枱望住師傅整
同時又處理緊薑
處理得好似雕花咁細心
刺身放係師傅中間，師傅會望下入面，再諗下一道上咩比你
前菜
有八爪魚、大根蘿蔔配巴馬火腿同埋柚子啫喱。八爪魚好彈牙，柚子啫喱外形好似迷你西瓜咁好得意，但我自己唔係好中意柚子，所以唔岩我口味
伴碟(牛蒡、准山、子薑、面豉蒜頭、榨菜頭)
開頭有牛蒡、准山、子薑，牛蒡用WASABI醃過，好爽口鮮甜，好食到食哂叫師傅再refill
食到咁上下，師傅再會比其他伴碟，就有面豉蒜頭同榨菜頭
準備開始第一道壽司！
望住師傅握壽司都係一種享受
真鯛壽司
一開始當然係由淡口食起，真鯛清新鮮甜，魚油不多，作開首好適合
深海池魚壽司
食落就爽口，油份會比鯛魚多一啲
油甘魚壽司
油甘魚上面放左一丁點既醬料，主要由柚子整成，味道偏咸酸，用以中和油甘魚既油份，但我自己覺得冇醬料好食啲
石垣貝壽司
石垣貝仲係生既，上枱前師傅會打一打石垣貝，等佢神經收縮，佢就會一下捲起，收縮後會更加爽口，食落好鮮甜，焾口得黎但又爽
斤子壽司
即係新鮮三文魚子，師傅話佢地有再加工過，食落去甜而不膩，粒粒油份係口中爆開好滿足！仲帶軟筋，而紫菜都唔馬虎！係係一個一直烘緊既鐵盒到拎出黎，以保持紫菜爽脆
鰹魚壽司
口感會有啲似拖羅，呢款鰹魚比平時食既唔一樣，平時既色澤係偏鮮紅，而呢款就偏粉紅啲，入口溶化，再經師傅燒過後，油脂更出
拖羅壽司
選用O拖羅，係拖羅最肥既部，接近赤拖羅，用上赤醋飯，配魚味重既用赤醋飯可以中和返兩者。呢款拖羅魚油好香，接近入口即溶但又有咬口
秋刀魚壽司
師傅話8月係秋刀魚旺季既開始，係最肥美，9月會再勁啲，食落魚味濃厚，唔洗點咬
赤鯥魚壽司
食落有少少似三文魚，同樣燒過，令其魚油更加出！係咁多款中魚油最重，會擴散係成個口中，食完之後條脷會仲有久久不散
牡丹蝦壽司
好有心意既一最後一道壽司，師傅話牡丹蝦上面放既係佢地用蝦膏蝦頭自己整成，再用火槍燒一燒，令香味更出，食後去牡丹蝦肉夠厚，先爽後稔，蝦膏味亦好岀，做十道壽司既最後一道果然一流
海膽手卷
用上北海道馬糞海膽，每份都舖上一整行既海膽～仲會用紫菜包住個底，唔驚佢跌出黎，好細心。海膽滑口，連不愛食海膽既另一半都食哂而且大讚好食！
蟹肉面䜴湯
蟹肉份量正常，飲落蟹味唔太出，呢個比較一般
富士山蘋果配杏仁豆腐
杏仁豆腐杏味好出！豆腐唔會好易爛，質感好綿滑，而且係一個冇負擔既甜品，女士食都唔覺得罪惡
呢一餐大約食左2小時，呢2小時係視覺同味覺既享受，一邊望住師傅整，跟住食完一件，師傅先再整第二件，當然，因為一個師傅同時整幾枱不同客人既食物，所以都要「排隊」等師傅整我地果份，但唔會覺得等到唔耐煩，我自己覺得食OMAKASE都要咁食先係嘆！
