呢度供應嘅放題限時2小時，任飲任食，可以任飲somersby蘋果酒添。餐廳環境唔錯，為配合磯燒，設置左抽氣嘅設備，食完都唔會一陣油煙味。有自助吧，供應沙律、壽司，涼拌小食，熱盤方面有炸薯角，同埋多款嘅雪糕同甜品，最吸引嘅係有個candy corner，可以俾人夾包小糖果走，小朋友見到真係超級開心。
食品方面，有刺身、壽司、天婦羅及燒物等等選擇，種類都幾多。
刺身我地order左三文魚、甜蝦、鮑片，非常新鮮。
另外壽司就先叫左鰻魚同火炙蒜蓉三文魚壽司黎試下，件件都又大又厚 ，三文魚配蒜蓉原來都幾夾，我地再encore左。
天婦羅，炸得好香脆。
牛肉豆腐鍋，豬推薦呢個，豆腐好滑，牛肉又多，另外有娃娃菜做底，味道唔錯。
芝士忌廉焗帆立貝，熱辣辣，好香忌廉味，帆立貝算大粒，又係再encore左一次。
主角出場！每枱都有備有燒烤爐，2-4人共用一個，入座後店員會簡單介紹燒烤方法，磯燒新手就唔怕無從入手啦。海鮮供應分兩類，會先黎一個海鮮拼盤，唔夠嘅話都仲可以再叫，但有d會收費，所以可以望清楚。海鮮上枱時仍然生猛，好正!任食海鮮有大蜆、青口、海蝦等，雖然種類唔算多，但水產質素甚高。店員同我地講，燒海鮮唔洗加太多調味，燒烤時，可以加d稀釋左嘅清酒，有降溫功效，避免燒燶爆殼之餘，亦可以令水產提升鮮味。
海鮮以外，亦有牛油粟米、金菇、菠蘿等燒。
最後食埋甜品就大滿足，個肚又漲卜卜喇，係時候散步行返屋企喇
