第五街冰室 (京瑞廣場) (已結業)

石門兩個廣場有好多嘢食，今日行行吓咁啱發現二期地下背後原來都開咗幾間舖頭，最後決定咗試呢一間，個名望落好港式嘅第五街冰室。裏面裝修同一般茶餐廳差唔多，亦都唔可以話係幾港式，但係有啲好個人化嘅擺設，好似模型同海報，有啲家庭小店嘅感覺。餐牌種類出奇地多，有中式同西式，鐵板，意粉，炒嘢，小菜，樣樣都有。我哋就叫咗一個set Dinner（$128）。主食方面就叫左T字骨意粉，意粉一上到嚟令人意外，因為非常大碟！我覺得兩個人食一碟意粉都可以。牛扒亦都好大塊，切落唔韌，食得出有牛味。黑椒汁普普通通，稍為有啲辣，但係飽肚感真係滿分。個餐仲有煙三文魚沙律做前菜。普普通通，不過不失。附送嘅紅湯或者白湯，我哋叫咗羅宋湯，都幾好飲，同埋都足料嘅。另外仲叫咗一個中式嘅炒野試試。呢度既小菜配埋白飯，湯同嘢飲，我哋叫咗個勝瓜云耳鮮魷（$88）都係非常大碟。鑊氣好重，鮮魷同瓜嘅比例唔會好大差別，調味黎講亦都非常唔錯，唔會太鹹或者太油膩。另外，碗飯係靚米黎嘅，值得一贊。總括來講我覺得呢間非常大件夾抵食，同埋多款式揀，不過可能人手唔多夠，等上嘢要耐少少。不過唔影響佢食物嘅質素，比我想像中好，可以一試。