君好扒燒西餐廳 (已結業)

同朋友補食生日飯，揀左呢間君好扒燒西餐廳，之前食過石燒覺得好好味，諗住食過番噚味，今次服務員同我地推介新口味菜式，覺得好新奇，咁就試下啦，其實都係半自助形式，不過今次食海鮮石鍋燒。冷盤及沙律吧保持水準，有凍蝦、凍青口：兩樣都好新鮮；又有煙三文魚、煙鮫魚、黑椒牛肉、Cold Cut、生果和沙律等：d煙三文魚和黑椒牛肉好正；餐湯有兩款，什菜湯和菠菜忌廉湯：我試左菠菜忌廉湯，濃度適中，好香忌廉味。另外每人有兩塊蒜蓉包配黑松露汁，把黑松露汁搽上個熱辣辣蒜蓉包上，超美味，強烈推介！主菜原來石鍋燒就好似石頭鍋飯個鍋咁樣，落埋d汁一齊煮，最好玩都係可以自己親手煮，好有滿足感。海鮮有5款：鮑魚、龍蝦尾、大蝦、長蟹腳和美國桶蠔，可揀其中2款，我揀左龍蝦尾和蟹腳，朋友揀左鮑魚和大蝦。湯汁有2款揀：有黑魚子醬香檳忌廉汁和香草野菌龍蝦汁，朋友揀前者，我食龍蝦梗係配後者。服務員好有心機及詳細咁教我地點煮，先把牛油落去熱辣辣的石鍋內，然後把海鮮倒落去，跟著落湯汁和香草，贊酒後焗5-6分鐘就食得。個石鍋真係好夠熱，好夠鑊氣，我地怕比油彈倒，好快手咁就將所有嘢落哂（自己好有大廚feel），5分鐘後，開蓋，真係好香呀！