漁不老烤魚雞煲火鍋 (諾士佛臺)

個人唔食辣，朋友推介話椰子雞煲岩我呢Ｄ唔食得辣既人，間餐廳因為用全椰子水做湯底，所以好清甜! 個老闆重教我地唔好咁大火, 唔係煲到隻雞老晒。煲完出黎雞肉好爽又好食！個煲入面重加左馬蹄、紅棗呢D養生野...都以為椰子水甜，用黎打邊爐會唔會好怪，不過用呢個湯再淥埋個餐包埋既野（牛同海鮮等等）都唔錯!

騸牯牛肉

100%椰子水雞煲

2人套餐

個2人餐包勁多野食! 個餐個小食叫左炸蝦卷。老公想食海蜇就另叫左一個小食!炸蝦卷同海蜇真係好好味!!! 

好味海蜇

炸蝦卷

之後重想講個水餃都真係幾好食! 我個人應為餐廳有個細心位係開頭會問你個豉油想要鹹定甜, 開頭唔係好明白, 咁就正路叫一鹹一甜試晒佢啦。

餐廳調製既鹹豉油＆雞

水餃及墨魚丸

之後佢上枱, 鹹既豉油原來個味係似沙薑豉油, 用黎點個椰子雞真係好好食!! 個豉油係餐廳煮出黎! 而甜既豉油就點水餃夾D!
重有覺得佢普遍全部野食都係幾好食! 海鮮個質素呢個價錢真係唔錯, 話說係個鮑魚唔記得拎返上黎，淥耐左，拎左上黎就以為唔食得啦.... 點知都一樣食到重要唔韌! D菜都好食! 未食個餐之前，以為去牛大X呢D吃到飽會覺得抵D，點知差唔多價錢， 呢度都一樣食到超飽!

時令海鮮拼盤

蔬菜藍

另外個芒果沙冰，因為好好飲，就問個老闆點樣整到咁好飲，原來個沙冰係用原個呂宋芒打出嚟！唔係假芒果。

芒果沙冰

食到最後好似差Ｄ野，問個餐廳有冇甜品，因為佢地新開都未決定有咩甜品，佢地話比我試下個涼粉。個涼粉真係正，好食係因為比較煙靭，同埋真係有涼粉草嘅味，我覺得有啲清熱嘅效用，打完爐食真係幾好。希望佢第日會係餐牌度啦！

好味涼粉(期間限定)

總括黎講係好食，會帶朋友再黎食！睇得出餐廳有放心機去食物度。環境都乾淨！唔錯既用餐體驗！
樓面唔多人，但有個位係我覺得Ｄ冰陣既牛肉食完放耐左碗底有水，Ｄ侍應係拎起隻碗時，免得Ｄ碗底水滴左落其他食物度，用第２隻手乘住，呢一下真係覺得服務到位。