海皇粥店 (已結業)

收工返到屋企，會先帶3兄弟落街散步、抺腳、拖地搞掂埋佢地晚餐，差不多成9點先至輪到我地食飯。記得海皇粥店8:30後有宵夜套餐，今晚就去試下啦。正在煩惱食咩嘅時候，四圍望下隔離左右有啲咩好野食下啦，見幾檯都係食火鍋！！！咪住，海皇粥店有火鍋食咁開心，我呢個火鍋怪即時轉軚，將個宵夜餐牌遞比我老婆，自己再揀下食咩火鍋先。我最後揀左雙份美國肥牛火鍋配南瓜粟米肉碎粥底，兩份肥牛，份量多個大x樂，其他配菜都係果啲丸呀，粟米、豆腐、水餃等等，但份量非常足夠。而老婆大人就揀左迷你皮旦瘦肉粥併蘿白糕，我再利佢個宵夜餐用優惠價加左條油條。平時食火鍋鍾意飲埋個吸收晒所有食材精華嘅湯，通常老婆就會話個湯唔健康，唔好飲啦，但今次粥底火鍋，終於可以攞正牌飲埋個粥底了P.S：食完先發覺原來店員比多左份火鍋配料我，唔怪得覺得個餐咁豐富啦，真係飽到聽朝都唔駛食早餐啦