滾爺火鍋 (金巴利道)

营业中

休息中

天氣寒冷，最好就係食火鍋，阿女同我都好鍾意去滾爺火鍋，佢嘅招牌椰子雞鍋，真係真材實料，百食不厭。滾爺係金馬倫道開咗分店，地方寬躺，環境光猛整潔，座位以卡位為主，每檯放有一部電視，邊食邊睇唔會悶，另外更設有貴賓房，方便人多聚會私隱度極高。首先上檯係即開新鮮椰皇和椰青各兩個、半隻雞、小馬蹄和椰子肉。店員將雞和配料放入鍋內，再倒入椰皇和椰青水，開火煮至滾，之後熄火焗5分鐘就可以食，湯底沒有加入任何水，純粹係椰青水，本身已經清甜，再加上雞的鮮味，飲落鮮甜美味，超正！雞肉亦好嫩滑。飲完椰子雞湯就可以加湯打邊爐。爽口手打鮮蝦滑：用新鮮蝦手打成蝦滑，再加入蝦粒，既爽口又有口感。手包鮮蝦雲吞：每粒雲吞都有鮮蝦，皮滑餡鮮。鯪魚滑釀豆卜：豆卜吸收左湯底，更加有豆香味，鯪魚滑亦好彈牙。