坐低冇耐，就嚟咗碟魚生壽司，已經唔記得係咩魚嘅壽司，總之就係新鮮好食嘅魚生壽司啦！
隔咗一陣，師傅就攞咗一個木盆，入邊裝住兩隻極大嘅南非鮑魚，係超大隻仲要不停咁郁，超級生猛👍🏻👍🏻未煮已經想食咗佢😂
師傅用昆布箍住隻鮑魚係鐵板到燒， 功架十足，絕對唔係亂咁燒，而係有方法有技巧將隻鮑魚煮好。上碟嘅時候，佢用一塊冬瓜墊底，再將鮑魚切片上碟，再淋上蟹肉昆布煮嘅汁，簡直係一絕！
然後就到主打嘅牛肉燒，大大塊牛肉加上師傅嘅手勢巧奪天工，一啲都唔鞋颯颯，配埋佢哋特製嘅蒜片，冇可能停得到口！😍😍
再嚟個炒雜菜，你以為冇乜特別？咁就錯喇！佢地啲菜，無論椰菜定係芽菜都係極度新鮮有機菜，其實炒雜菜都有技巧，可以吵到唔淋但又剛剛熟，仲要爽口嘅，真係呢度嘅師傅是做得到！
去到套餐尾聲，就係個日式炒飯，多料唔在講，個炒飯啲飯粒粒分明，又唔油膩係好考功夫！最後，來多個朱古力慕絲做甜品🍸，上面淋有士多啤梨汁，為呢餐生日飯做一個完美嘅句號！😉😉
