傷心酸辣粉 (已結業)

响旺角家樂商場對面,開咗間傷心酸辣粉(即雞蛋仔專門店毗鄰樓上).之前只幫襯過位於深水埗間傷心酸辣粉,唔--好--食!嗰碟佢地自稱"馳名"既口水雞,仲衰,d雞肉係嚡既!個味道就得個"辣"字既啫!冇喇,冇其他喇!亦都冇再幫襯過喇!尋日去旅行社,見到d職員嗌登打士街呢間傷心酸辣粉既外賣,就問下佢地好唔好食啦!佢地話好味喎!咁啱我同阿會又正肚餓,我地又嗜食辣野既...咁就試下呢間新開既啦!咦...同深水埗嗰間唔同噃!呢間唔難食個噃!非但唔會淡戊戊冇厘味道之餘,仲幾夠味tim噃!得喎!我點咗個雞脾菇小辣酸辣粉,嘩...都幾辣,下次都係嗌BB辣穩陣d;至於味道,個湯夠晒咸,當中仲帶點酸,加埋辣,認真惹味;個雞脾菇都好夠味.個中辣龍抄手(即係豬肉雲吞),嘩嘩嘩...對於我黎講,"中辣"真係好鬼辣,辣到食第一口嗰陣,真係辣到講唔到野,好好好辣呀!!至於個雲吞都ok啦!可能太辣喇,就算好味都已經食唔出喇!不過成隻雲吞都係豬肉餡囉!我覺得如果可以加番d蝦或者菜仲好!所以,唔太食得辣既朋友,都係唔好嗌中辣或以上,否則就會如佢地既口號:酸到流口水,辣到流眼淚!