岩鹽日本料理 (利舞臺廣場) (已結業)

今日既午餐好想食得豐盛啲，於是就走左去利舞臺個邊去食呢間岩鹽日本料理。雜錦壽司定食份量真係好滿足，壽司每舊都好大舊，件件都好新鮮。最值得推介既就係佢地甜蝦壽司，甜蝦既份量好大隻，食落去充滿彈性，蝦既甜味慢慢散發出黎，回甘鮮美。其次就係吞拿魚蓉軍艦，吞拿魚蓉好肥美，一啲都唔腥，而且咬落去吞拿魚蓉既油脂慢慢係個口到散開。其他既壽司都十分鮮美，而且好厚身，食落去既海鮮既新鮮甜美完全出哂黎。除左壽司之外，仲有茶碗蒸。茶碗蒸好滑，蛋味都算濃郁，入面有小小既海鮮令到蛋味提鮮。仲有麵豉湯同埋沙律小砵。本身以為應該完結，點知之後仲有牛肉烏冬。牛肉烏冬既份量都唔小，上到枱牛肉仲有小小既偏紅，浸熟左之後食落去十分軟滑同埋牛肉味道濃郁，加埋煙韌既烏冬，好夾。最後再黎一個雪糕，令今餐食到真正既大滿足。