榮記茶餐室

营业中

休息中

呢間茶餐廳響我地頭，幾年前推出芝士煲仔飯已經闖出名堂，之後知道上年推出左煲仔沙爹牛肉麵 但一直無去食，直到近期被《香港沙爹牛肉麵關注組》熱推，朋友話想試就去食下。邊有諗過香港人咁顛，星期六下午三點去到都要等四十張枱！不過一心想食，就無謂轉場，結果等大概一個鐘先有位。呢度食個常餐只係$42包埋飲品，真。沙爹煲仔麵 $68真心唔平，一上枱開蓋見到個沙爹湯滾緊，而個出前一丁仲未軟，影下相，浸下撈下個麵開始熟。沙爹湯好濃，花生味重，有點似喇沙，牛肉幾多又夠滑，配料仲有芽菜同豆卜。瓦煲上能夠保持熱度，食到尾都仲夠熱，冬天食真係唔錯，不過值唔值$68就見仁見智，因為配熱飲仲要加$5，配凍飲加$7。值得一讚係員工幾有禮，著淺色衫會主動問客要唔要一次性圍裙，見客户湯底太杰會問客要唔要加杯熱水溝稀。